Mga Impormasyon Tungkol sa Alcoholism

Kailangang maunawaan ng isang tao ang mga bagay na kaakibat ng sakit na alcoholism. Ang pagkakaunawa niya tungkol sa mga bagay na ito ang siyang magiging daan upang kanyang malabanan ang ganitong kalagayan. Sapagkat ang alcoholism ay hindi pangkaraniwang sakit na maaaring magamot sa pamamagitan ng iba’t ibang klase ng medisina, kinakailangan ang matinding atensyon at seryosong pagkaunawa upang gumaling.

Isang bagay na dapat maunawaan ng isang tao ay ang katotohanang ang alcohol sa mga nakalalasing na inumin ay isang uri ng depressant na nakaaapekto sa ating sistema particular na sa ating central nervous system. Ang labis na pag-inom nito ay nakapagpapadagdag sa gawain at proseso ng ating mga internal organs tulad ng puso at utak. Ang epekto nito sa ating katawan ay maaaring magdulot ng napakaraming sakit at karamdaman na magiging malala sa kalaunan. Kung hindi maaagapan, ang mga sakit na ibubunga ng pag-aabuso sa alcohol ay magiging sanhi ng kamatayan.

Narito pa ang ilan sa mga impormasyon na makatutulong upang lubusang maunawaan ang alcoholism:

- Ang alcohol at caffeine ay dalawang substance na madalas abusuhin sa ating panahon. Ngunit mas matindi ang epekto at impact ng alcohol sa ating buhay. Ito ang nagiging dahilan ng maraming problema ng mga tao na nalululong dito.

- Ang mga problemang kinasasangkutan ng mga taong nalululong sa alak ay papataas pa. Ayon sa mga pag-aaral na isinagawa ng mga siyentipiko at doktor, labinlimang porsiyento ng populasyon sa mundo ang may problema ukol dito. Hindi pa kasama dito ang mga pamilya at kakilala ng mga alcoholic na apektado rin ng problema kadalasan.

- May dalawang kategorya ang alcoholism: ang pag-abuso at ang pagkakalulong dito. Ang pagkakalulong sa alak ang kadalasang nagiging kondisyon ng isang tao kapag madalas ang abusong ginagawa niya sa alcohol. Ito rin ang mga taong nagkakaroon at nakararanas ng mga withdrawal symptoms kung kanilang ihihinto ang pag-inom nito.

- Maraming dahilang kung bakit nalululong ang isang tao alak. Ang pag-abuso nito ang kadalasang nagiging ugat ng pagkakalulong na may mga kaakibat ding mga sitwasyon. Sa kalahatan, ang mga aspetong personal lalo na sa pamilya at relasyon ang nagiging sanhi ng pagiging alcoholic ng isang tao. Ang pamilya ay isa sa itinuturing na pinakamadalas na pinagmumulan ng pag-abuso nito dahil na rin sa mga problemang nangyayari sa kanila.

- Maraming kabataan ang nagiging alcoholic kapag umabot na sa kanilang katandaan. Bunga ito marahil ng hindi agarang pagbibigay ng lunas sa kanilang mga problema nang maaga.

Ang mga impormasyon tungkol sa alcoholism na nabanggit sa itaas ay ilan lamang sa mga bagay na dapat alamin upang lubusang maintindihan ang uri ng ganitong kalagayan. Ipinapayong magpatingin sa mga doktor kung may mga bagay na nais na lubusan pang maunawaan. Ang mga doktor, higit kaninuman ang siyang nakaaalam ng mga bagay ukol dito at makapagbibigay ng mga payong medikal kung kinakailangan.